শ্ৰীলংকাৰ কলোম্বস্থিত স্বামী বিবেকানন্দ সাংস্কৃতিক কেন্দ্ৰত আজি কিংবদন্তি কণ্ঠশিল্পী জুবিন গাৰ্গৰ স্মৰণত এক বিশেষ অনুষ্ঠান অনুষ্ঠিত কৰা হয়। অনুষ্ঠানত শ্ৰীলংকাৰ ইণ্ডিয়ান কাউন্সিল ফৰ কালচাৰেল ৰিলেচন (ICCR)-এ জুবিন গাৰ্গলৈ গভীৰ শ্ৰদ্ধাঞ্জলি জ্ঞাপন কৰে। ICCR-এ শিল্পীগৰাকীৰ অকাল মৃত্যুক সংগীত আৰু সাংস্কৃতিক ক্ষেত্ৰৰ বাবে এক অপূৰণীয় ক্ষতি বুলি উল্লেখ কৰে। শিল্পীগৰাকীৰ মায়াসনা সুৰবোৰ জনতাৰ হৃদয়ত চিৰদিন জীয়াই থাকিব বুলি আইচিচিআৰে প্ৰকাশ কৰে৷ উল্লেখ্য যে, ইণ্ডিয়ান কাউন্সিল ফৰ কালচাৰেল ৰিলেচন(ICCR) ভাৰত চৰকাৰৰ এক স্বায়ত্তশাসিত সংস্থা৷ এই সংস্থাটো ভাৰতৰ বিশ্বব্যাপী সাংস্কৃতিক সম্পৰ্কৰ সৈতে জড়িত৷ অনুষ্ঠানত স্বামী বিবেকানন্দ সাংস্কৃতিক কেন্দ্ৰৰ সঞ্চালক/সচিব অধ্যাপক অংকুৰণ দত্ত উপস্থিত থাকি জুবিন গাৰ্গৰ সংগীতৰ বিভিন্ন দিশৰ ওপৰত আলোকপাত কৰে।