ইজৰাইলক লৈ কৰা মন্তব্যৰ বাবেও পাকিস্তানত চৰ্চাত গৌৰৱ গগৈ

সংসদত ভাৰতবিৰোধী বক্তব্য প্ৰদানেৰে পাক মিডিয়াৰ মধ্যমণি হৈ পৰা অসমৰ সাংসদ গৌৰৱ গগৈৰ চৰ্চা অব্যাহত আছে পাক সংবাদ মাধ্যমত৷ সংসদৰ মজিয়াত ভাষণ দি অপাৰেচন সেন্দূৰ সন্দৰ্ভত বিভিন্ন প্ৰশ্ন উত্থাপন কৰি পাকিস্তানক পৰোক্ষভাৱে সহায় কৰা গৌৰৱ গগৈৰ যিকোনো বা-বাতৰি পাকিস্তানী মিডিয়াই অতি গুৰুত্বসহকাৰে প্ৰকাশ কৰি আহিছে৷ এতিয়া এনেকুৱা পৰ্যায় পাইছে যে গৌৰৱ গগৈয়ে ইয়াতে মাৰে টিপা, পাকিস্তান পাইগৈ শিপা! অবৈধ বাংলাদেশী তথা মিঞাৰ সমৰ্থনত স’ততে সৰৱ হৈ পৰা গৌৰৱ গগৈয়ে অসম চৰকাৰৰ উচ্ছেদৰ বিৰুদ্ধাচাৰণ কৰা বা মুখ্যমন্ত্ৰী ড০ হিমন্ত বিশ্ব শৰ্মাৰ বিৰুদ্ধাচাৰণ কৰা বা-বাতৰিও পাক মিডিয়াই গুৰুত্বসহকাৰে প্ৰকাশ কৰা দেখিবলৈ পোৱা গৈছে৷ আনকি গৌৰৱ গগৈয়ে ইজৰাইলক লৈ কৰা মন্তব্যও এতিয়া পাকিস্তানত চৰ্চাৰ বিষয় হৈ পৰা পৰিলক্ষিত হৈছে৷

এতিয়া পাকিস্তান মিডিয়াৰ দৃষ্টিত গৌৰৱ হৈ পৰিছে দ্যা হীৰো অৱ পাকিস্তান৷ গৌৰৱ হৈ পৰিছে পাকিস্তানৰ নায়ক! পাকিস্তানৰ TOP Digital 24×7, পাকিস্তান-কাশ্মীৰৰ PKN News, Islamabad Times আদিত চাৰ্চাৰ কেন্দ্ৰবিন্দু হৈ পৰিছে অসমৰ সাংসদ গৌৰৱ গগৈ৷ উল্লেখ্য যে সংসদত দিয়া ভাষণেৰে এটা ৰাতিৰ ভিতৰতে পাকিস্তানী মিডিয়াৰ নয়নৰ মণি হৈ পৰিছিল কংগ্ৰেছী সাংসদ গৌৰৱ গগৈ। যিবোৰ প্ৰশ্নৰ উত্তৰ পাকিস্তানে বিচাৰি আছিল, সেই প্ৰশ্নসমূহ সংসদৰ মজিয়াত গৌৰৱ গগৈয়ে উত্থাপন কৰি পাকিস্তানক পৰোক্ষভাৱে সহায় কৰিছিল। সংসদৰ মজিয়াত গৌৰৱ গগৈয়ে ড’নাল্ড ট্ৰাম্পৰ উদ্ধৃতিৰে অপাৰেচন সিন্দূৰত ভাৰতৰ কিমানখন যুদ্ধ বিমান ধ্বংসপ্ৰাপ্ত হৈছে, অপৰেচন সিন্দূৰ ভাৰতে আধাতে কিয় বন্ধ কৰি দিলে আদি দেশৰ আভ্যন্তৰীণ প্ৰতিৰক্ষা সম্পৰ্কীয় প্ৰশ্নৰ উত্তৰ প্ৰতিৰক্ষা মন্ত্ৰী ৰাজনাথ সিঙৰ পৰা জানিবলৈ বিচাৰিছিল। গৌৰৱ গগৈৰ এই ভূমিকাত খুবেই অত্যুৎসাহী হৈ পৰিছিল পাকিস্তানী মিডিয়া। ইয়াৰ বিপৰীতে অসমৰ মুখ্যমন্ত্ৰী ড০ হিমন্ত বিশ্ব শৰ্মাক সমালোচনা কৰি পাকিস্তানী মিডিয়াই বাতৰি পৰিৱেশ কৰা পৰিলক্ষিত হৈছে৷ অসমৰ মুখ্যমন্ত্ৰী ড০ হিমন্ত বিশ্ব শৰ্মাই কংগ্ৰেছৰ সাংসদ গৌৰৱ গগৈৰ বিৰুদ্ধে গুৰুতৰ অভিযোগ উত্থাপন কৰা বুলি বাতৰি পৰিৱেশন কৰিছে৷ গৌৰৱ গগৈয়ে পাকিস্তানৰ আই এছ আইৰ সৈতে সম্পৰ্ক স্থাপন কৰি প্ৰশিক্ষণৰ বাবে কেনদৰে পাকিস্তানলৈ গৈছিল সেই সন্দৰ্ভতো বাতৰি পৰিৱেশন কৰে পাকিস্তানী মিডিয়াই৷ গৌৰৱ গগৈয়ে পাকিস্তানৰ সাংস্কৃতিক বা বৈদেশিক পৰিক্ৰমা মন্ত্ৰ্যালয়ৰ পৰা নহয়, পোনপটীয়াকৈ গৃহ বিভাগৰ পৰাহে নিমন্ত্ৰণ লাভ কৰিছিল বুলি মুখ্যমন্ত্ৰীয়ে মন্তব্য প্ৰকাশ কৰাৰ বিষয়ে উল্লেখ কৰি মুখ্যমন্ত্ৰী ড০ হিমন্ত বিশ্ব শৰ্মাই ইয়াক “বিপজ্জনক সংকেত” বুলি অভিহিত কৰা বুলি পাক মিডিয়াই বাতৰি প্ৰকাশ কৰিছে৷ আনহাতে, ৰাজনৈতিক পৰ্যবেক্ষকমহলে ভাৰতীয় জনতা পাৰ্টিৰ নেতৃত্বই বিভিন্ন স্পৰ্শকাতৰ ৰাষ্ট্ৰীয় বিষয়সমূহক ৰাজনৈতিক উদ্দেশ্যত ব্যৱহাৰ কৰা বুলি উল্লেখ কৰি পাকিস্তানী মিডিয়াই বাতৰি পৰিৱেশন কৰাও দেখিবলৈ পোৱা গৈছে৷