📌মুখ্যমন্ত্ৰী ড০ হিমন্ত বিশ্ব শৰ্মাক হুংকাৰ আৰছাদ মাদানীৰ
📌আৰছাদ মাদানীক সকীয়নি দল-সংগঠনৰ
📌’অসমত মুছলমানক টাৰ্গেট কৰা হৈছে, বাংলাদেশী হোৱাটো কোনো অপৰাধ হ’ব নোৱাৰে’
📌নাগৰিক সমাজৰ সভাত বিস্ফোৰক মন্তব্য বুদ্ধিজীৱি ছায়েদা হামিদৰ
📌ছায়েদা হামিদৰ মন্তব্যই জ্বলাইছে অসম
📌বুদ্ধিজীৱিগৰাকীৰ বিৰুদ্ধে ব্যৱস্থা গ্ৰহণৰ দাবী দল-সংগঠনৰ
📌ছায়েদা হামিদক উগ্ৰ ‘বাংলাদেশীপ্ৰেমী’ আখ্যা মন্ত্ৰী পীযুষ হাজৰীকাৰ

মৌলানা মেহমুদ মাদানীৰ পিছত এইবাৰ আৰছাদ মাদানীৰ হুংকাৰ দিলে ৰাজ্যৰ মুখ্যমন্ত্ৰীক। অসমৰ মুছলমানক লৈ কেইবাটাও বিস্ফোৰক মন্তব্য কৰি মুখ্যমন্ত্ৰী ড০ হিমন্ত বিশ্ব শৰ্মাক হুংকাৰ জমিয়তৰ আন এটা গোটৰ মুৰব্বী আৰছাদ মাদানীয়ে। অসমৰ মুখ্যমন্ত্ৰীৰ কৰ্মকাণ্ডক তীব্ৰ সমালোচনা কৰি মৌলবাদী সংগঠনটোৰ নেতাগৰাকীয়ে মুখ্যমন্ত্ৰীৰ চৰিত্ৰ বেয়া চৰিত্ৰ, ঘৃণনীয় চৰিত্ৰ বুলি মন্তব্য কৰে। অসমৰ মুছলমানসকলক শান্তিৰে থাকিবলৈ নিদিয়াৰ পণ লৈ মুখ্যমন্ত্ৰীয়ে মুছলমানক কবৰ দিয়া কাম আৰম্ভ কৰা বুলি অভিযোগ উত্থাপন কৰি নেতাগৰাকীয়ে মুখ্যমন্ত্ৰীক তীব্ৰ প্ৰত্যাহ্বান জনায়। মুখ্যমন্ত্ৰীৰ এই কাৰ্য কিমানদিনলৈ চলে তেওঁলোকে চাই ল’ব বুলি মন্তব্য কৰে। জমিয়ত উলেমা জীয়াই থকালৈকে, আল্লাই আমাক জীয়াই ৰখালৈকে মুখ্যমন্ত্ৰীয়ে কি কৰিব পাৰে, চাই যাম বুলি আৰছাদ মাদানীয়ে তীৰ্যক মন্তব্য কৰে। মুখ্যমন্ত্ৰীক হুংকাৰ দিয়া আৰচাদ মাদানীৰ ভিডিঅ’ সামাজিক মাধ্যমত ভাইৰেল হৈ পৰাৰ পিছতে বিষয়টোক লৈ অসমত তীব্ৰ প্ৰতিক্ৰিয়াৰ সৃষ্টি হৈছে। ইপিনে, গুৱাহাটীৰ চানমাৰিৰ লক্ষ্মীৰাম বৰুৱা সদনত অনুষ্ঠিত নাগৰিক সমাজৰ সভাত অংশগ্ৰহণ কৰি বিতৰ্কিত মন্তব্য কৰা সমাজকৰ্মী ছৈয়দা হামিদকলৈও তীব্ৰ প্ৰতিক্ৰিয়াৰ সৃষ্টি হৈছে। অসমত মুছলমানক টাৰ্গেট কৰা হৈছে। বাংলাদেশী হোৱাটো কোনো অপৰাধ হ’ব নোৱাৰে। বাংলাদেশী হ’ল বুলিয়েই অত্যাচাৰ কৰিব নেকি অসমৰ মুখ্যমন্ত্ৰীয়ে? অসমত বাংলাদেশীও থাকিলেও কাৰো অধিকাৰ খৰ্ব নহয় বুলি অসমৰ উচ্ছেদিত লোক সন্দৰ্ভত নাগৰিক সমাজৰ সভাত বিস্ফোৰক মন্তব্য আগবঢ়ায় সমাজকৰ্মী ছৈয়দা হামিদে।

অসমত বাংলাদেশী থকাত কোনো অসুবিধা নাই বুলি বিস্ফোৰক মন্তব্য কৰে সমাজকৰ্মী ছৈয়দা হামিদে। লেখক, বুদ্ধিজীৱী, সমাজকৰ্মী ছৈয়দা হামিদৰ এই মন্তব্যৰ পিছতে জাঙুৰ খাই উঠে অসমৰ জাতীয় দল-সংগঠন। ছৈয়দা হামিদৰ মন্তব্যক আছুৱে গৰিহণা দি হামিদক অসমবিৰোধী, ভাৰতবিৰোধী মন্তব্য নকৰিবলৈ সকীয়নি প্ৰদান কৰে। আছুৰ সভাপতি উৎপল শর্মাই কয় যে ছৈয়দা হামিদৰ মন্তব্য অসম তথা ভাৰত বিৰোধী মন্তব্য। অসম সম্পৰ্কে কোনো জ্ঞান নাই ছৈয়দা হামিদৰ। আছু নেতাগৰাকীয়ে আয়োজকসকলকো তীব্ৰ গৰিহণা দিয়ে। সভাৰ উদ্যোক্তাসকলক এনে লোকক আমন্ত্ৰণ নকৰিবলৈও তেওঁ আহ্বান জনায়। আনহাতে ছৈয়দা হামিদক সংযত আচৰণ কৰিবলৈ সকীয়াই দিয়ে জাতীয়তাবাদী নেতাই। জাতীয়তাবাদী নেতা চিতু বৰুৱাই এই সন্দৰ্ভত তীব্ৰ প্ৰতিক্ৰিয়া প্ৰকাশ কৰি কয় যে ভাৰতৰ একাংশ মুছলমানে বাংলাদেশ আৰু পাকিস্তানৰ হৈ কাম কৰি আছে। অসম তথা ভাৰতক ইছলামী দেশ কৰাৰ তেওঁলোকৰ লক্ষ্য। উচ্ছেদ অভিযানত ধৰ্মীয় প্ৰলেপ নাসানিবলৈ সকীয়নি প্ৰদান কৰি এনে বিতৰ্কিত মন্তব্য আগবঢ়োৱা বুদ্ধিজীৱিগৰাকীৰ বিৰুদ্ধে তাৎক্ষণিক ব্যৱস্থা গ্ৰহণ কৰিবলৈ নেতাগৰাকীয়ে দাবী জনায়। ইপিনে, এনে লোকক আমন্ত্ৰণ কৰাৰ বাবে নাগৰিক সমাজৰ উদ্যোক্তা সাংসদ অজিত ভূঞাৰ বিৰুদ্ধেসৰৱ হৈ পৰিছে দল-সংগঠন। উজনিত অজিত ভূঞাৰ প্ৰৱেশ নিষিদ্ধ কৰিছে জাতীয় সংগ্ৰামী সেনাই। অজিত ভূঞা উজনিলৈ যাব নোৱাৰিব বুলি চিতু বৰুৱাই স্পষ্ট কৰি দিয়ে। আনহাতে, মন্ত্ৰী পীযুষ হাজৰীকাই সামাজিক মাধ্যমত এই সন্দৰ্ভত তীব্ৰ প্ৰতিক্ৰিয়া প্ৰকাশ কৰে। মন্ত্ৰীগৰাকীয়ে ছৈয়দা হামিদক উগ্ৰ বাংলাদেশপ্ৰেমী বুলি অভিহিত কৰে। তেওঁ কয় যে উগ্ৰ ‘বাংলাদেশীপ্ৰেমী’ ছৈয়দা হামিদৰ কংগ্ৰেছ দল আৰু সাংসদ গৌৰৱ গগৈৰ পৰিয়ালৰ সৈতে দীৰ্ঘদিনীয়া সম্পৰ্ক আছে। আমোদজনক কথাটো হ’ল অসমত কংগ্ৰেছৰ শাসনকালত এইগৰাকী বাংলাদেশীপ্ৰেমী ছৈয়দা হামিদৰ উপৰি বহু বিদেশী কূটনীতিবিদক লৈ ‘অসমৰ মুছলমানৰ বাবে প্ৰত্যাহ্বান’ শীৰ্ষক ছেমিনাৰ/ৱেবিনাৰ আয়োজন হৈছিল। মন্ত্ৰীগৰাকীয়ে ছৈয়দা হামিদক সমালোচনা কৰি কয় যে প্ৰকৃততে এওঁলোক হ’ল অবৈধ বাংলাদেশী অনুপ্ৰৱেশকাৰীক সমৰ্থন, সুৰক্ষা আৰু ৰাজনৈতিক আশ্ৰয় প্ৰদানৰ ষড়যন্ত্রকাৰী। অসমৰ ভূমি, ভাষা, ঐতিহ্য, অস্তিত্বৰ প্ৰতি কংগ্ৰেছ দলে এওঁলোকৰ দৰে ব্যক্তিৰ সহায়ত যি ষড়যন্ত্র ৰচিছিল, এতিয়া সকলো কথা ৰাইজে বুজি পাইছে। মন্ত্ৰীগৰাকীয়ে অনুপ্ৰৱেশকাৰীয়ে অসম এৰি যাবই লাগিব বুলি স্পষ্ট কৰি দিয়ে। কংগ্ৰেছীয়ে অবৈধ বাংলাদেশীসকলৰ দুখত যিমান ইচ্ছা কন্দা-কটা কৰি নাথাকক কিয় আমাৰ চৰকাৰ খিলঞ্জীয়াক সুৰক্ষা প্ৰদানৰ বাবে প্ৰতিশ্ৰুতিবদ্ধ বুলি মন্ত্ৰীগৰাকীয়ে প্ৰকাশ কৰে। উল্লেখ্য যে কংগ্ৰেছৰ দিনত এইদৰে ৰাজ আতিথ্য পাইছিল এইগৰাকী বাংলাদেশী প্ৰেমী ছায়েদা হামিদে। ২০১১ চনত কংগ্ৰেছ চৰকাৰৰ দিনত গুৱাহাটীত এনেদৰেই বক্তব্য প্ৰদান কৰিছিল ছায়েদা হামিদে। মুখ্যমন্ত্ৰী প্ৰয়াত তৰুণ গগৈৰ লগত একেলগে সভাত অংশগ্ৰহণ কৰিছিল এইগৰাকী নেত্ৰীয়ে।