টাডা ৪৩/২০০১ গোচৰৰ ৰায়দান, ৩৮ জনক দোষমুক্ত ঘোষণা

নিউজ ডেস্কঃ টাডা আদালতে আজি গুৰুত্বপূৰ্ণ ৰায়দান কৰে। টাডা ৪৩/২০০১ গোচৰৰ ৰায়দান কৰি ৩৮ জনক দোষমুক্ত ঘোষণা কৰে টাডা আদালতে। উল্লেখ্য যে ১৯৯১ চনত দিছপুৰ থানাই নিজাকৈ গোচৰটো পঞ্জীয়ন কৰিছিল। ২০০১ চনৰ পৰা TADA আদালতত গোচৰটোৰ বিচাৰ প্ৰক্ৰিয়া আৰম্ভ হয়। সুদীৰ্ঘ ২৫ বছৰ বিচাৰ প্ৰক্ৰিয়াৰ অন্তত ৩৫ বছৰীয়া গোচৰটোৰ আজি আদালতে ৰায়দান দিয়ে। ৪৩/২০০১ নং টাডা গোচৰটোত মুঠ ৪৫ অভিযুক্ত আছিল। ইয়াৰে পৰেশ বৰুৱা সহ ৩ জন বৰ্তমানো পলাতক। আনহাতে, চাৰিজনৰ মৃত্যু হোৱা বাবে তেওঁলোকৰ নাম গোচৰটোৰ প্ৰত্যাহাৰ কৰা হৈছে। সেয়েহে আজি ৩৮ অভিযুক্তৰ বিৰুদ্ধে ৰায়দান কৰে। সন্ত্ৰাস সৃষ্টি কৰা, ধন দাবী আদি বিভিন্ন অভিযোগৰ ভিত্তিত দিছপুৰ থানাই ১/১৯৯১নং গোচৰটো ৰুজু কৰিছিল। অবৈধ কাৰ্যকলাপ প্ৰতিৰোধ আইন (UAP) ৰ ১০(৩০) ধাৰা আৰু TADA আইনৰ ৩/৪ ধাৰা আৰোপ কৰা হৈছিল। লগতে IPC বহু কেইটা ধাৰাও আৰোপ কৰিছিল গোচৰটোত। মূল অভিযুক্তসকল অনুপ চেতিয়া, প্ৰদীপ গগৈ, অৰবিন্দ ৰাজখোৱা, মুনিন নবিশ, কল্পজ্যোতি নেওগ, ৰাজু বৰুৱা, শশধৰ চৌধুৰী, সুনীল নাথ, অনাদৰ ঠাকুৰীয়া আদিকে ধৰি মুঠ ৩৮ জনৰ বিৰুদ্ধে টাডা আদালতে আজি ৰায় প্ৰদান কৰে।