🔹অসমত IIM স্থাপন হোৱাটো নিবিচাৰে কংগ্ৰেছে
🔹লোকসভাত ভোটদানৰ সময়ত অসমৰ কংগ্ৰেছী সাংসদৰ বিধেয়কখনৰ তীব্ৰ বিৰোধিতা
🔹সামাজিক মাধ্যমত মুখ্যমন্ত্ৰী ড০ হিমন্ত বিশ্ব শৰ্মাৰ প্ৰতিক্ৰিয়া
🔹’অসমৰ ৰাইজে কংগ্ৰেছক কেতিয়াও ক্ষমা নকৰে’
🔹কংগ্ৰেছৰ অসম বিৰোধী এই নিকৃষ্ট মানসিকতাক অসমবাসীয়ে সদায় মনত ৰাখিবঃ মুখ্যমন্ত্ৰী ড০ হিমন্ত বিশ্ব শৰ্মা

কালিৰ দিনটো আছিল ৰাজ্যখনৰ বাবে এক ঐতিহাসিক দিন। কিয়নো কালি অসমত আই আই এম স্থাপনৰ উদ্দেশ্যে অনা বিধেয়কখন লোকসভাই গৃহীত কৰে। ইয়াৰ লগে লগে অসমত ইণ্ডিয়ান ইনষ্টিটিউট অৱ মেনেজমেণ্ট (আই আই এম) প্ৰতিষ্ঠান স্থাপনৰ বাট প্ৰশস্ত হৈ পৰে। কিন্তু কালিৰ সেই ঐতিসাহিক ক্ষণটোতে পৰিলক্ষিত হ’ল বিৰোধী দল কংগ্ৰেছৰ দুমুখীয়া চৰিত্ৰ। অসমৰ জনতাৰ উন্নয়নৰ বাবে চিন্তা নকৰা কংগ্ৰেছ দলৰ এই কাণ্ড দেখি ৰাজ্যখনৰ জনসাধাৰণ হতভম্ব হৈ পৰে। কংগ্ৰেছৰ এই কাৰ্যক বিভিন্নজনে গৰিহণা দিয়াৰ লগতে ঘৃণনীয় ৰাজনীতিৰে কংগ্ৰেছে অসম তথা অসমবাসীক বিশ্বমানৰ প্ৰতিষ্ঠা লাভৰ পৰা বঞ্চিত কৰিব বিচৰা বুলি বিভিন্নজনে মন্তব্য কৰিছে।
উল্লেখ্য যে কালি লোকসভাত বিধেয়খন গৃহীত কৰিবলৈ ভোট দান হোৱা সময়ত লোকসভাৰ অধ্যক্ষৰ আসনৰ পৰা সদন পৰিচালনা কৰি আছিল দৰং ওদালগুৰি সমষ্টিৰ সাংসদ তথা বিজেপিৰ অসম প্ৰদেশৰ ৰাজ্যিক সভাপতি দিলীপ শইকীয়া। সেই সময়ত কংগ্ৰেছ দলৰ অসমৰ সাংসদ কেইজনৰ লগতে অন্যান্য কংগ্ৰেছ দলৰ সাংসদসকলে এই বিধেয়কৰ তীব্ৰ বিৰোধিতা কৰি সদনত হুলুস্থূলীয়া পৰিৱেশৰ সৃষ্টি কৰে। সদন পৰিচালনা কৰি থকা লোকসভাৰ অধ্যক্ষ দিলীপ শইকীয়াই অসমৰ সাংসদসকলক বিধেয়কখন সমৰ্থন কৰিবলৈ অনুৰোধ জনায়। অধ্যক্ষৰ আসনৰ পৰাই শইকীয়াই কংগ্ৰেছৰ লগতে সকলো বিৰোধী দলক বিধেয়কখন সমৰ্থন কৰিবলৈ অনুৰোধ জনায়। তেওঁ কয় যে আই আই এম স্থাপন হ’বলৈ গৈ আছে, আপোনাকে য়েছ বুলি কওক। ন বুলি নক’ব। অসমত প্ৰথমবাৰৰ বাবে আজি প্ৰধানমন্ত্ৰীৰ নেতৃত্বত এক বৃহৎ প্ৰতিষ্ঠান স্থাপন হ’বলৈ গৈ আছে, আপোনালোকে অনুগ্ৰহ কৰি সমৰ্থ কৰক।
ইপিনে, মুখ্যমন্ত্ৰী ড০ হিমন্ত বিশ্ব শৰ্মাই এই সন্দৰ্ভত সামাজিক মাধ্যমত প্ৰতিক্ৰিয়া প্ৰকাশ কৰি কংগ্ৰেছ দলক তীব্ৰ সমালোচনা কৰে। কালিৰ দিনটোত এটা অতি আচৰিত তথা একে সময়তে দুৰ্ভাগ্যজনক পৰিস্থিতি প্ৰত্যক্ষ কৰা বুলি উল্লেখ কৰি বিষয়টো প্ৰতিগৰাকী অসমবাসীয়ে জনা উচিত বুলি মুখ্যমন্ত্ৰীগৰাকীয়ে প্ৰকাশ কৰে। অসমত আই আই এম স্থাপনৰ বাবে বিধেয়ক গৃহীত কৰিবলৈ লোকসভাই ভোটদান কৰাৰ সময়ত নিৰ্লজ্জভাৱে অসমৰ কংগ্ৰেছী সাংসদসকলে ইয়াৰ তীব্ৰ বিৰোধিতা কৰাৰ কথা উল্লেখ কৰি মুখ্যমন্ত্ৰীগৰাকীয়ে কংগ্ৰেছৰ এনে কাণ্ডক গৰিহণা দিয়ে। তেওঁ কয় যে আপুনি কল্পনা কৰিব পাৰিবনে যে কংগ্ৰেছে অসমক কিমান ঘৃণা কৰে যে তেওঁলোকে আমাৰ ৰাজ্যলৈ আই আই এম অহাটোও নিবিচাৰে? এয়া কংগ্ৰেছৰ অত্যন্ত নিন্দনীয় মানসিকতা৷ আমাৰ মানুহে তেওঁলোকৰ এই কাৰ্যৰ বাবে কেতিয়াও ক্ষমা নকৰে আৰু অসম বিৰোধী এই নিকৃষ্ট মানসিকতাক সদায় মনত ৰাখিব৷
উল্লেখ্য যে কালি লোকসভাত IIM গুৱাহাটী সম্পৰ্কীয় বিধেয়কখন ধ্বনি ভোটৰ জৰিয়তে গৃহীত হয়। কিন্তু এই বিধেয়কখনৰ কংগ্ৰেছে বিৰোধিতা কৰা সন্দৰ্ভত মুখ্যমন্ত্ৰী ড০ হিমন্ত বিশ্ব শৰ্মাই আজি সংবাদ মাধ্যমৰ আগত তীব্ৰ প্ৰতিক্ৰিয়া ব্যক্ত কৰে। মুখ্যমন্ত্ৰীগৰাকীয়ে কয় যে ইণ্ডিয়ান ইনষ্টিটিউট অৱ মেনেজমেণ্ট (আই আই এম) বিধেয়কখন কালি সদনত উত্থাপন কৰা হয়। কংগ্ৰেছ দল আৰু অসমৰ পৰা যোৱা কংগ্ৰেছৰ সাংসদসকলে বিলখনৰ বিৰোধিতা কৰে। কংগ্ৰেছে ন ন বুলি চিঞৰি বিলখনৰ বিৰোধিতা কৰে। ইয়াৰ ভিডিঅ’ও আছে। অসমৰ ৰাইজে এই ঘটনাবোৰ নিজেও চাই আছে যে নিজৰ ৰাজ্যত ইণ্ডিয়ান ইনষ্টিটিউট অৱ মেনেজমেণ্ট (আই আই এম) আহিব, তাকো কংগ্ৰেছে বিৰোধিতা কৰে। মুখ্যমন্ত্ৰীগৰাকীয়ে কয়, ‘কংগ্ৰেছ দল যে অসম বিৰোধী, তাক তেওঁলোকে বাৰে বাৰে প্ৰমাণ দি থাকে। আমি প্ৰমাণ দিয়াৰ দৰকাৰেই নাই। ছেমি কণ্ডাক্টৰৰ সময়ত মল্লিকাৰ্জুন খাৰ্গেৰ ল’ৰাই বিৰোধিতা কৰিছিল, আই আই এমত অসমৰ পৰা যোৱা কংগ্ৰেছৰ সাংসদসকলে বিৰোধিতা কৰিছে, গতিকে এওঁলোকৰ বিষয়ে অসমৰ ৰাইজে বুজি পায় আৰু সেই কাৰণে মই ভাবো যে অসমৰ ৰাইজে তেওঁলোকক যোগ্য উত্তৰ দি আহিছে আৰু দি যাব।