▶️‘প্ৰসন্ন তুৰুঙৰ হত্যাৰ অভিযোগত অভিযুক্ত সাংসদ প্ৰদ্যুৎ বৰদলৈ’
▶️‘গঁড় হত্যাৰ বাবে ৰকিবুল হুছেইন যিমান দায়ী সিমানেই দায়ী সাংসদ প্ৰদ্যুৎ বৰদলৈ’
▶️প্ৰদ্যুৎ বৰদলৈয়ে কু-চক্ৰান্ত কৰি লাভ নাই, তেওঁ এজন ব্যৰ্থ মন্ত্ৰী, ব্যৰ্থ বিধায়ক, ব্যৰ্থ সাংসদঃ মন্ত্ৰী পীযুষ হাজৰীকা
▶️আগন্তুক লোকসভা নিৰ্বাচনত প্ৰদ্যুৎ বৰদলৈক ৯০ হাজাৰ ভোটত পৰাস্ত কৰাৰ হুংকাৰ মন্ত্ৰী পীযুষ হাজৰীকাৰ

গঁড় হত্যা আপুনি ৰোধ কৰিব পৰা নাছিল৷ আপোনাৰ বিৰুদ্ধে প্ৰসন্ন তুৰুঙৰ হত্যাৰ অভিযোগ আছে৷ আপোনাৰ দিনত আপুনি যেতিয়া শক্তিমন্ত্ৰী আছিল, আপুনি য’ত হাৰি পেলাই নগাঁওলৈকে পলাবলৈ বাধ্য হৈছিল, সেই মাৰ্ঘেৰিটা সমষ্টিত মই স্বচক্ষে দেখিছিলো তাত ইলেক্ট্ৰিক পোষ্ট নাছিল, তাত বাঁহৰ খুঁটা আছিল৷ গতিকে আপুনি এগৰাকী ব্যৰ্থ মন্ত্ৰী, ব্যৰ্থ বিধায়ক, ব্যৰ্থ সাংসদ৷ আপুনি মোৰ লগত বা আমাৰ সমষ্টি বা আমাৰ দলৰ লগত চক্ৰান্ত কৰি একো ফল নাপাব, আজিৰ এই যোগদানৰ ঘটনাৰে আমি প্ৰমাণ দিছো৷- এই মন্তব্য মন্ত্ৰী পীযুষ হাজৰীকাৰ৷ আজি বিজেপিৰ জাগী ভকতগাঁও মণ্ডল কাৰ্যালয়ত অনুষ্ঠিত এক যোগদান কাৰ্যসূচীৰ অন্তত সংবাদ মাধ্যমৰ মন্ত্ৰীগৰাকীয়ে এইদৰে মন্তব্য কৰে৷ প্ৰায়ে পীযুষ হাজৰীকাক আক্ৰমণৰ লক্ষ্য কৰি লোৱা নগাঁও লোকসভা সমষ্টিৰ সাংসদ প্ৰদ্যুত বৰদলৈক তীব্ৰ সমালোচনাৰে থকা-সৰকা কৰে মন্ত্ৰী পীযুষ হাজৰীকাই৷ মন্ত্ৰীগৰাকীয়ে কয় যে গঁড় হত্যাৰ বাবে ৰকিবুল হুছেইন যিমান দায়ী সিমানেই দায়ী সাংসদ প্ৰদ্যুৎ বৰদলৈ৷ মাৰ্ঘেৰিটাৰ পৰা আহি মুছলমানৰ ভোটেৰে নগাঁও লোকসভা সমষ্টিৰ সাংসদ হৈ জাগীৰোড সমষ্টিত দাদাগিৰি নকৰিবলৈ প্ৰদ্যুৎ বৰদলৈক সকীয়াই দি আগন্তুক লোকসভা নিৰ্বাচনত প্ৰদ্যুৎ বৰদলৈক ৯০ হাজাৰ ভোটত পৰাস্ত কৰাৰো হুংকাৰ দিয়ে মন্ত্ৰীগৰাকীয়ে৷
উল্লেখ্য যে জাগীৰোড সমষ্টিৰ পশ্চিম মায়ং পঞ্চায়তৰ ৩০ গৰাকী কংগ্ৰেছ কৰ্মীয়ে আজি বিজেপি দলত যোগদান কৰে৷ প্ৰায় দুমাহ ধৰি তেওঁলোকে বিজেপি দলত যোগদান কৰাৰ বাবে মন্ত্ৰীগৰাকীৰ সৈতে যোগাযোগ কৰি আছিল যদিও মন্ত্ৰীগৰাকীয়ে বিভিন্ন কামত ব্যস্ত থকাৰ বাবে সময় দিব পৰা নাছিল বুলি জানিবলৈ দিয়ে৷ আজি তেওঁলোকে যোগদান কৰিবলৈ অহা অত্যন্ত সুখী হোৱা বুলি মন্তব্য কৰি মন্ত্ৰীগৰাকীয়ে কয় যে আজি আমাৰ দলত যোগদান কৰাসকলক তেওঁলোক নিজ নিজ অঞ্চলত যথেষ্ট শক্তিশালী৷ কংগ্ৰেছ দলৰ কাম-কাজত তেওঁলোক অতিষ্ঠ হৈ বিজেপি দলত যোগদান কৰে৷ নাম উল্লেখ নকৰাকৈ কংগ্ৰেছ দলৰ সাংসদ প্ৰদ্যুৎ বৰদলৈক তীব্ৰ সমালোচনা কৰি মন্ত্ৰীগৰাকীয়ে কয় যে লাহৰীঘাট, ধিং, ৰূপহীহাট, চামগুৰিৰ ভোটত তেওঁ জিকিছে যদিও জাগীৰোডত অতি বেয়াকৈ ধৰাশয়ী হৈছে৷ ৭৭ হাজাৰ ভোটত জাগীৰোডত প্ৰদ্যুৎ বৰদলৈ হাৰিছিল আৰু তেতিয়াৰ পৰাই তেওঁ মন্ত্ৰীগৰাকীক হিংসা কৰিবলৈ লয় বুলি মন্ত্ৰী পীযুষ হাজৰীকাই মন্তব্য কৰে৷ তেওঁ সাংসদ প্ৰদ্যুৎ বৰদলৈক উদ্দেশ্যি কয় যে গঁড় হত্যা আপুনি ৰোধ কৰিব নোৱাৰিলে, আপোনাৰ বিৰুদ্ধে প্ৰসন্ন তুৰুঙৰ হত্যাৰ অভিযোগ আছে, আপোনাৰ দিনত আপুনি যেতিয়া শক্তিমন্ত্ৰী আছিল, আপুনি য’ত হাৰি পেলাই নগাঁওলৈকে পলাবলৈ বাধ্য হৈছিল, সেই মাৰ্ঘেৰিটা সমষ্টিত মই স্বচক্ষে দেখিছিলো তাত ইলেক্ট্ৰিক পোষ্ট নাছিল, তাত বাঁহৰ খুঁটা আছিল৷ গতিকে আপুনি এগৰাকী ব্যৰ্থ মন্ত্ৰী, ব্যৰ্থ বিধায়ক, ব্যৰ্থ সাংসদ, গতিকে আপুনি মোৰ লগত বা আমাৰ সমষ্টি বা আমাৰ দলৰ লগত চক্ৰান্ত কৰি একো ফল নাপাব, আজিৰ এই যোগদানৰ ঘটনাৰে আমি প্ৰমাণ দিছো৷
মন্ত্ৰীগৰাকীয়ে পুনৰ কয় যে প্ৰদ্যুৎ বৰদলৈৰ এটাই কষ্ট যে কিয় তেওঁ জাগীৰোডত ৭৭ হাজাৰ ভোটত হাৰিলে? কিয় জাগীৰোডত কোনো এটা অনুষ্ঠানে তেওঁক নামাতে? কিয় জাগীৰোডত এহেজাৰ মানুহ লৈ ক’তো এখন মিটিং তেওঁ পাতিব নোৱাৰে? কাৰোবাৰ ঘৰত বহি দুই-চাৰিটা মানুহ ফুচুলাই লৈ গৈ তেওঁ মিটিং পাতে৷ তেওঁ নামঘৰৰ মনিকূটৰ পইচা দিম বুলি ফাঁকি দি মানুহবোৰ লৈ গৈ মিটিং কৰে৷ প্ৰদ্যুৎ বৰদলৈয়ে কু-চক্ৰান্ত কৰি লাভ নাই৷ আমি ৰাইজৰ কাৰণে কাম কৰিছো, ৰাইজৰ লগত আছো, গতিকে আমাক ইয়াত ভগৱানৰ আশীৰ্বাদত একো কৰিব নোৱাৰে৷ এই বছৰ তেওঁক ৭৭ হাজাৰ ভোটত হৰুৱাইছো, অহা বছৰ ৯০ হাজাৰ ভোটত তেওঁক হৰুৱাম বুলি মন্ত্ৰীগৰাকীয়ে মন্তব্য কৰে৷
উল্লেখ্য যে আজি জাগী ভকতগাঁও মণ্ডল কাৰ্যালয়ত অনুষ্ঠিত যোগদান কাৰ্যসূচীত ভাৰতীয় জনতা পাৰ্টিৰ মৰিগাঁও জিলাৰ সভাপতি ৰামপ্ৰসাদ সৰকাৰ, পশ্চিম মায়ং মণ্ডলৰ সভাপতি চন্দন দাসসহ দলৰ বহুকেইগৰাকী জ্যেষ্ঠ কাৰ্যকৰ্তাৰ উপস্থিতিত কংগ্ৰেছৰ নেতাকেইগৰাকীয়ে বিজেপি দলত যোগদান কৰে। মন্ত্ৰীগৰাকীয়ে যোগদান কৰা আটাইকে বিজেপি পৰিয়াললৈ আদৰণি জনায় আৰু দলৰ সাংগঠনিক ভেটি শক্তিশালীকৰণৰ ক্ষেত্ৰত সহায়-সহযোগিতা আন্তৰিকতাৰে কামনা কৰে।