কচুতলিৰ খিলঞ্জীয়া মুছলমান পৰিয়ালৰ হিন্দু ধর্ম গ্রহণ

নিউজ ডেস্ক, সোণাপুৰ, ২০ ডিচেম্বৰঃ সোণাপুৰ কচুতলি অঞ্চলৰ খিলঞ্জীয়া মুছলমান সম্প্ৰদায়ৰ পৰিয়াল এটা আজি সম্পূর্ণ হিন্দু ধৰ্মৰ ৰীতি-নীতি অনুসৰি ধৰ্মান্তৰকৰণ কৰা হয়। আজি সোণাপুৰৰ এলেঙাকৰ হৰেকৃষ্ণ মন্দিৰত অনুষ্ঠিত এক অনুষ্ঠানত বৈদিক পৰম্পৰা অনুসৰি কচুতলিৰ হাফিজ আলী আৰু তেওঁৰ পত্নী ৰিজুৱানা বেগমে হিন্দু ধৰ্ম গ্ৰহণ কৰি ৰাহুল বড়ো আৰু ভূমিকা বড়োলৈ ৰূপান্তৰিত হয়। কচুতলিত পোন প্ৰথমবাৰৰ বাবে স্থানীয় দল-সংগঠন আৰু ৰাইজে লক্ষ্মী পূজাৰ আয়োজন কৰাৰ সময়তে পৰিয়ালটি হিন্দু ধৰ্মৰ প্ৰতি আকর্ষিত হয় আৰু হিন্দু ধৰ্ম গ্ৰহণৰ বাবে আগ্রহ প্রকাশ কাৰে। ফলত ইছলামধর্মী লোকেৰে পৰিপূৰ্ণ কচুতলিত থকা বাসগৃহ ত্যাগ কৰি বিগত দুটা মাহে আন ঠাইত থাকিবলগীয়া পৰিৱেশৰ সৃষ্টি হয়। হিন্দু ধৰ্মৰ প্ৰতি আকৰ্ষিত হোৱাৰ অনুমান কৰি পৰিয়ালটোৰ আৰু ইছলাম সমাজৰ সকলো লোকে তেওঁলোকৰ সৈতে সম্পর্ক ছেদ কৰে। আজি হিন্দু ধৰ্মৰ পৰম্পৰা অনুসৰি ডিগাৰু নৈৰ পাৰত মুণ্ডন আৰু প্ৰায়চিত্ত কৰাৰ পিছতেই হৰেকৃষ্ণ মন্দিৰত ব্ৰাহ্মণৰ জৰিয়তে হোম-যজ্ঞ আৰু আয়তীৰ নাম-প্ৰসংগৰ জৰিয়তে পৰিয়ালটিয়ে হিন্দু ধর্ম গ্রহণ কৰে। বিশ্ব হিন্দু পৰিষদ, বজৰং দল আৰু ৰাষ্ট্ৰীয় স্বয়ংসেৱক সংঘৰ ডিমৰীয়া প্ৰখণ্ডৰ উদ্যোগত আয়োজিত এই অনুষ্ঠানত বিশ্ব হিন্দু পৰিষদৰ উত্তৰপূব প্ৰান্তৰ সহঃ মন্ত্ৰী বিধান চন্দ্ৰ দেৱৰয় আৰু কৃষ্ণ কুমাৰ সিঙৰ লগতে ৰাষ্ট্ৰীয় স্বয়ং সেৱক সংঘৰ অসম প্ৰান্তৰ ধৰ্ম জাগৰণ প্রমুখ যোগেশ শাস্ত্ৰৰী, উত্তৰ পূৰ্বাচঞ্চলৰ ক্ষেত্ৰ প্ৰচাৰ প্ৰমুখ সুনীল মহান্তিৰ লগতে কেইবাজনো অতিথি উপস্থিত থাকে।