নগাঁৱৰ পৰা জয়ন্ত মুদৈ, ২৫ জুলাইঃ নগাঁৱৰ ধিঙত ধাৰাবাহিক ভাৱে সংঘটিত হৈ অহা স্প্ৰে’ চোৰৰ সন্ত্ৰাসৰ বাবে ধিং আছুৰ উদ্যোগত ৰূপায়ণ কৰা হয় তীব্ৰ প্ৰতিবাদ ৷ শ’লগুৰি বামগাঁৱত এগৰাকী ষাঠি উৰ্ধ্বৰ অকলশৰীয়া মহিলাৰ ঘৰত স্প্ৰে’ চতিয়াই মহিলা গৰাকীক অচেতন কৰি নিৰ্যাতন চলাই ঘৰৰ সা সম্পত্তি লুটি নিয়ে ৷ এই ঘটনাৰ চৌবিশ ঘণ্টাৰ পাৰ নহৌতেই যোৱা নিশা নাম ডুমডুমীয়াৰ গোপাল নাথ আৰু মণজিৎ মেধিৰ ঘৰত অনুৰূপ ঘটনা সংঘটিত হয় ৷ দুৰ্বৃত্তই স্প্ৰে’ ছটিওৱাৰ ফলত অচেতন হৈ পৰে পৰিয়ালৰ সদস্য সকল ৷ ততাতৈয়াকৈ আটাইকে ধিং এফ আৰ ইউত ভৰ্তি কৰা হয় যদিও গোপাল নাথ আৰু আন এগৰাকী মহিলাৰ অৱস্থা শোচনীয় হোৱাত চিকিৎসাকে উন্নত চিকিৎসাৰ বাবে নগাঁৱলৈ প্ৰেৰণ কৰে ৷ পিছে আজি লৈকে ধিঙত প্ৰায় ১০/১৫ টাকে এনে ঘটনা সংঘটিত হৈছে যদিও আৰক্ষীয়ে অঞ্চলটোৰ ৰাইজক নিৰাপত্তা দিয়াত চূড়ান্ত ব্যৰ্থ হৈছে ৷ ফলত ক্ষুব্ধ ৰাইজে আছুৰ সহযোগত বৃহস্পতিবাৰে বজাৰ বন্ধ কৰি আৰু ৰাজপথ বন্ধ ৰাখি তীব্ৰ প্ৰতিবাদ সাব্যস্ত কৰে ৷ ফলত বহু সময়লৈকে ব্যাহত হৈ পৰে অঞ্চলটোৰ স্বাভাৱিক যাতায়ত ব্যৱস্থা ৷ আনকি ধিং আৰক্ষী আৰু অসম আৰক্ষী বিৰুদ্ধ শ্ল’গান দি ৰাজপথ কপাই তোলে শ শ জনতাই । পিছত ঘটনাস্থলীত নগাঁও অতিৰিক্ত আৰক্ষী অধীক্ষক উপস্থিত হৈ প্ৰতিবাদী ৰাইজক আশ্বাস প্ৰদান কৰাতহে প্ৰতিবাদ স্থগিত ৰাখে ৰাইজে ।