নগাঁৱৰ পৰা জয়ন্ত মুদৈ, ২০ জুলাইঃ নগাঁও জিলাৰ হুজগাঁৱৰ সমীপৰ কঁহুৱাতলীৰ শ্ৰী শ্ৰী কঁহুৱাতলী ডৌকাচাপৰি সত্ৰৰ সত্ৰাধিকাৰ তুলসী মহন্তৰ বৃহস্পতিবাৰে নিশা পৰলোকপ্ৰাপ্তি ঘটে । সত্ৰীয়া কলা-সংস্কৃতিৰ একান্ত সাধক আৰু সমাজকৰ্মী হিচাপে পৰিচয় থকা সত্ৰাধিকাৰ মহন্ত অসম সত্ৰ মহাসভাৰ উপদেষ্টা, মহাসভাৰ আজীৱন সভ্য হোৱাৰ লগতে কঁহুৱাতলী অঞ্চলৰ বিভিন্ন অনুষ্ঠান-প্ৰতিষ্ঠানৰ সৈতে জড়িত থাকি সমাজৰ হকে সেৱা আগবঢ়াই আহিছিল ৷ মৃত্যুৰ সময়ত তেওঁৰ বয়স হৈছিল ৮২ বছৰ ৷ সত্ৰীয়া কৃষ্টি-সংস্কৃতিৰ প্ৰসাৰত অবদান যোগাই অহা সত্ৰাধিকাৰগৰাকীৰ মৃত্যুত অঞ্চলজুৰি শোকৰ ছাঁ পৰাৰ বিপৰীতে সত্ৰৰ ভকত-বৈষ্ণৱ আৰু বিভিন্ন অনুষ্ঠানৰ লগতে ব্যক্তি বিশেষে শোক প্ৰকাশ কৰি শোক সন্তপ্ত পৰিয়ালবৰ্গলৈ গভীৰ সমবেদনা জনাইছে ৷ মৃত্যুৰ সময়ত তেওঁ পত্নী, এজন পুত্ৰ, দুগৰাকী কন্যাৰ লগতে চাৰিজন ভাতৃৰ সৈতে বহু আত্মীয়-স্বজনক ইহসংসাৰত এৰি থৈ যায় ৷