নগাঁৱৰ পৰা জয়ন্ত মুদৈ, ১৬ জুলাইঃ নগাঁও জিলাৰ জাজৰি আৰক্ষী থানাৰ এলেকাধীন ৰাইদঙীয়াত সোমবাৰে নিশা এক ভয়ংকৰ অগ্নিকাণ্ডৰ ঘটনা সংঘটিত হয় ৷ অগ্নিকাণ্ডৰ ফলত কোনো লোক হতাহত হোৱা নাই যদিও এখন ব্যৱসায়িক প্ৰতিষ্ঠান সম্পূৰ্ণৰূপে ভস্মীভূত হোৱাৰ বিপৰীতে পাঁচ লক্ষাধিক টকাৰ সা-সামগ্ৰী জুইত জাহ যায় ৷ প্ৰাপ্ত খবৰ মতে, ৰাইদঙীয়াৰ বৰিবজাৰত থকা বি জে ইলেক্ট্ৰনিকছ নামৰ ম’বাইলৰ পাৰ্টছ বিক্ৰী, মেৰামতি আৰু এল ই ডি বাল্ব বনোৱা ব্যৱসায়িক প্ৰতিষ্ঠানখনত এই বিধ্বংসী অগ্নিকাণ্ডৰ ঘটনা সংঘটিত হয় । নিশা হঠাতেই জ্বলি উঠা জুইৰ লেলিহান শিখাই নিমিষতে ব্যৱসায়িক প্ৰতিষ্ঠানখন আগুৰি ধৰি সকলো ছাই কৰি পেলাই ৷ পৰিণতিত ব্যৱসায়িক প্ৰতিষ্ঠাখনত থকা লেপটপ, ম’বাইল হেণ্ডছেট, ম’বাইলৰ বিভিন্ন সামগ্ৰী, ফেন, লাইট আদিকে ধৰি বহু আচবাব জুইত ভস্মীভূত হয় ৷ অৱশ্যে কথমপি ৰক্ষা পৰে ষ্টেট বেংকৰ এটা শাখাৰ লগতে আন চাৰিখনকৈ ব্যৱসায়িক প্ৰতিষ্ঠান ৷ ঘটনাৰ আকস্মিকতাত সমগ্ৰ অঞ্চলটোত হুৱাদুৱা পৰিস্থিতিৰ সৃষ্টি হয় আৰু বহুলোক সমবেত হৈ বটদ্ৰৱা অগ্নি নিৰ্বাপক বাহিনীক খবৰ দিয়ে ৷ পিছত অগ্নি নিৰ্বাপক বাহিনীয়ে স্থানীয় ৰাইজৰ সহযোগত জুই নিৰ্বাপন কৰিবলৈ সক্ষম হয় ৷ বিদ্যুতৰ শ্ব’ৰ্ট ছাৰ্কিটৰ ফলতেই জুইৰ সূত্ৰপাত হৈ এই ভয়ংকৰ অগ্নিকাণ্ডৰ ঘটনা সংঘটিত হোৱাৰ সন্দেহ ব্যক্ত কৰিছে স্থানীয় ৰাইজে ৷ উল্লেখ্য যে, স্থানীয় বিকু শইকীয়া নামৰ দৰিদ্ৰ পৰিয়ালৰ এজন যুৱকে নতুনকৈ আৰম্ভ কৰি এই ব্যৱসায়ীক প্ৰতিষ্ঠানখনৰ জৰিয়তে অতি কষ্টৰে পৰিয়াল পোহ-পাল দি আছিল । কিন্তু নিশা সংঘটিত অগ্নিকাণ্ডৰ ঘটনাটোৰ পিছত এতিয়া দৰিদ্ৰ পৰিয়ালটোৰ মূৰত সৰগ ভাগি পৰিছে ৷