ভগা মথাউৰিৰে হুৰাহুৰে সোমাইছে পানী

নগাঁৱৰ পৰা জয়ন্ত মুদৈ, ৩ জুলাইঃ সমগ্ৰ ৰাজ্যতে বলীয়া বানে ভয়াৱহ ৰূপ ধাৰণ কৰাৰ সময়তে নগাঁও জিলাৰ দক্ষিণ-পশ্চিমাঞ্চল বছৰৰ তৃতীয়টো বানৰ কৱলত পৰাৰ বাতৰি পোৱা গৈছে ৷ বিগত দিনকেইটাত হোৱা ধৰাষাৰ বৰষুণৰ হেতু পুনৰ কপিলী নৈৰ জলপৃষ্ঠ বৃদ্ধি পোৱাত এতিয়া কপিলীৰ বাঢ়নী পানীয়ে কামপুৰ ৰাজহ চক্ৰৰ বহু অঞ্চল প্লাৱিত কৰিছে । আচলতে, ধাৰাষাৰ বৰষুণৰ লগতে ভুতৰ ওপৰত দানহ পৰাদি উমৰাংচুৰ খানদং বান্ধ খুলি দিয়াৰ ফলত ফেনে ফুটুকাৰে কপিলীৰ জলপৃষ্ঠ বৃদ্ধি পাই বুৰাই পেলাইছে কামপুৰৰ ন ন অঞ্চল । ফলত অধিক পৰিমাণে আতংকিত হৈ পৰিছে অঞ্চলবাসী জনতা ৷ সম্প্ৰতি কামপুৰত বিপদসীমাৰ ওপৰেৰে কপিলী নৈৰ জলপৃষ্ঠ বৈ থকা বুলি জানিব পৰা গৈছে । ইফালে, বছৰৰ দ্বিতীয়টো বানে সৃষ্টি কৰা তাণ্ডৱৰ কথা মনৰ পৰা আঁতৰ নৌহওঁতেই পুনৰ পটিয়াপামৰ ভগ্ন মথাউৰিৰে হুৰাহুৰে পানী সোমোৱাৰ ফলত কামপুৰ আৰু কঠীয়াতলী মৌজাৰ প্ৰতি স্বাভাবিকতেই শংকা নামি আহিছে ৷ তদুপৰি চাংজুৰাই, পটিয়াপাম, তিনি নং ৰে’ল গেটত কামপুৰ-যমুনামুখ সংযোগী ব্যস্ততাপূৰ্ণ পথটোৰে হুৰা হুৰে পানী বাগৰিছে বুলি খবৰ পোৱা গৈছে । এনে পৰিস্থিতিত নৈপৰীয়া ৰাইজক সজাগ আৰু সচেতন হৈ থাকিবলৈ মাইকযোগে প্ৰশাসনে আহ্বান জনোৱাত ৰাইজ অধিক শংকিত হৈ পৰিছে । ইফালে, কামপুৰ পৌৰসভাৰ এলেকাধীন বুঢ়াপতিয়া গাঁৱৰ সাতটা পৰিয়ালে কামপুৰৰ বুঢ়া মায়ঙৰ প্ৰাথমিক বিদ্যালয়ত আশ্ৰয় লোৱা বুলি জানিব পৰা গৈছে ।