নগাঁৱৰ পৰা জয়ন্ত মুদৈ, ২৯ জুনঃ নগাঁও জিলাৰ অন্যতম অগ্ৰণী শিক্ষানুষ্ঠান জাজৰি আদৰ্শ উচ্চতৰ মাধ্যমিক বিদ্যালয়ৰ বিজ্ঞানাগাৰৰ কোঠা নিৰ্মাণ কামৰ শুভাৰম্ভ কৰা হয় ৷ এই উদ্দেশ্য শনিবাৰে এক গাম্ভীৰ্যপূৰ্ণ পৰিবেশত নগাঁও জিলাৰ বিদ্যালয়সমূহৰ পৰিদৰ্শক প্রভাত দাসৰ উপস্থিতিত উক্ত কামৰ আধাৰশিলা স্থাপন কৰে বটদ্ৰৱা সমষ্টিৰ বিধায়িকা শিৱামনি বৰাই ৷ আধাৰশিলা স্থাপন কৰি বিধায়িকা শিৱামনি বৰাই ঐতিহ্যমণ্ডিত বিদ্যালয়খনৰ ইতিহাস তথা স্মৃতি ৰোমণ্ঠন কৰি আৱেগিক হৈ পৰাৰ লগতে শিক্ষানুষ্ঠানখনৰ উত্তৰোত্তৰ কামনা কৰে ৷ তেওঁ ভাষণ প্ৰসংগত কয় যে-এই বিদ্যালয়খনৰ এটি বিজ্ঞানাগাৰৰ খুবেই প্ৰয়োজন আছিল ৷ এইটো সম্পূৰ্ণ হৈ উঠিলে বিদ্যালয়খনৰ পৰিবেশ আৰু অধিক উন্নত হৈ পৰিব ৷ এখন বিদ্যালয়ৰ সৰ্বাংগীণ উন্নয়ণ তথা মানদণ্ড উন্নত নহ’লে ছাত্ৰ-ছাত্ৰীয়ে মনত দুখ পায় ৷ ফলত পঢ়া-শুনাত কিছু হ’লেও ব্যাঘাট জন্মে ৷ অনুষ্ঠানত বিদ্যালয়ৰ ভাৰপ্ৰাপ্ত শৈক্ষিক বিষয়া স্মৃতিৰেখা বৰা, বিদ্যালয় পৰিচালনা সমিতিৰ সদস্য আব্দুছ চাত্তাৰ, আমিনুৰ ৰহমান, নৰেল হাফিজ, সমাজকৰ্মী ধৰ্মেন্দ্ৰ বৰদলৈ, বক্তৰ হুছেইনৰ লগতে বিদ্যালয়ৰ শিক্ষক-শিক্ষয়িত্ৰীসকল উপস্থিত থাকে । উল্লেখ্য, সমগ্ৰ শিক্ষা, অসমৰ অধীনত মুঠ ১৪,৩২,৭০০ টকা ব্যয়েৰে নিৰ্মাণ হবলগীয়া এই বিজ্ঞানাগাৰ কোঠাটি অহা দুমাহৰ ভিতৰত নিৰ্মাণকাৰ্য সম্পূৰ্ণ হৈ উঠিব বুলি বিদ্যালয় কৰ্তৃপক্ষই জানিবলৈ দিছে ৷