কামাখ্যাত‌ অম্বুবাচীৰ সময়ত ভক্তসকলে সন্মুখীন হোৱা অসুবিধা সন্দৰ্ভত সাংবাদিকৰ আগত নিজৰ প্ৰতিক্ৰিয়া প্ৰকাশ প্ৰকাশ কৰে মন্ত্ৰী জয়ন্ত মল্ল বৰুৱাই৷ কামাখ্যাৰ অম্বুবাচী অতি সফলতাৰে সম্পন্ন হোৱা বুলি উল্লেখ কৰি, এচামে কেৱল স্বাৰ্থজনিত কাৰণত অপপ্ৰচাৰত লিপ্ত হোৱা বুলি অভিযোগ কৰে মন্ত্ৰীগৰাকীয়ে৷ আনহাতে, কামাখ্যাত সাধু-সন্তৰ প্ৰতিবাদ সন্দৰ্ভতো মন্ত্ৰীগৰাকীয়ে প্ৰতিক্ৰিয়া প্ৰকাশ কৰে৷ VIP/VVIP পাছৰ কোনো ব্যৱস্থা নথকাৰ বাবেই বহুলোকে বিতৰ্কৰ সূচনা কৰা বুলি সংবাদ মাধ্যমৰ আগত মন্তব্য কৰে মন্ত্ৰীগৰাকীয়ে৷ তেওঁ কয় যে এইবাৰ কোনো VIP/VVIP ৰ ব্যৱস্থা কৰা হোৱা নাই। ময়ো সাধাৰণ মানুহৰ দৰে দৰ্শন কৰিছো৷ আনকি মুখ্যমন্ত্ৰীয়ে আজি মন্দিৰ দৰ্শন কৰিছো। মন্ত্ৰী জয়ন্ত মল্লবৰুৱাই এটা চামে অনাহকতে বিতৰ্ক কৰা বুলি মন্তব্য কৰি কয় যে কামাখ্যাত ভক্তৰ সা-সুবিধাবোৰ চৰকাৰে নহয়, দলৈ সমাজে চায়। প্ৰথম দিনাৰ সভাতে মোক তেওঁলোকে জনাইছে। দলৈ সমাজৰ পৰামৰ্শ অনুসৰিয়েই অম্বুবাচীৰ নীতি-নিৰ্দেশনাসমূহ জাৰি কৰা হৈছিল বুলি মন্ত্ৰীগৰাকীয়ে প্ৰকাশ কৰে। তেওঁ পুনৰ কয় যে ইয়াত আমাৰ নিজস্ব একো সিদ্ধান্ত নাথাকে৷ মন্দিৰ পৰিচালনা কৰে দলৈ সমাজে৷ দলৈ সমাজৰ কথা আমি মানিব লাগিব৷ তেওঁলোকেই ক’লে যে জোতা-চেণ্ডেলবোৰ এইবাৰ তলতে ৰখা হওক, নহ’লে প্ৰতি বছৰে এক ট্ৰাক এক ট্ৰাক চেণ্ডেল আমি পেলাই দিব লাগে৷ ইমান দূৰলৈকেতো কাৰ্পেট পাৰি দিব নোৱাৰিব, তেতিয়া তেওঁলোকে ক’লে যে আমি পানী মাৰি দি থাকিব লাগিব৷ তেওঁলোকে কোৱাৰ দৰে তেনেকৈ ব্যৱস্থা গ্ৰহণ কৰা হ’ল৷ কিন্তু কথাটো এনেকুৱাকৈ ওলাইছে যেন এইবোৰ চৰকাৰে কৰিছে৷ চৰকাৰে ইয়াত একো নকৰে, চৰকাৰে দলৈ সমাজে যেকেকৈ কয় তেনেকৈ কৰে৷
আনহাতে, কামাখ্যাত সাধু-সন্তৰ প্ৰতিবাদ সন্দৰ্ভত মন্ত্ৰীগৰাকীয়ে প্ৰতিক্ৰিয়া প্ৰকাশ কৰি কয় যে সাধু-সন্তই প্ৰতিবাদ কৰা সম্পৰ্কত যিধৰণে ডাঙৰ বাতৰি পৰিৱেশন কৰা হৈছে সেয়া একো ডাঙৰ কথা নহয়৷ ইয়াৰ দুবছৰ আগতেও সাধু-সন্তই প্ৰতিবাদ কৰিছিল৷ সাধু-সন্তই প্ৰতিবাৰে নিজৰ মাজতে প্ৰতিবাদ কৰে৷ মন্ত্ৰীগৰাকীয়ে কয় যে সাধাৰণতে সাধু-সন্তৰ ব্যৱস্থাটো আমি চৰকাৰে নাচাও৷ তাত এটা দস্তামি আখাৰা আছে৷ সেইটো তেওঁলোকে চলায়৷ তেওঁলোকক দলৈ সমাজে খোৱা-বোৱা আদিকে ধৰি কিছুমান ব্যৱস্থা কৰি দিয়ে৷ মই নাভাবো যে তাত আমাৰ মিছ মেনেজমেণ্ট হৈছে৷ কিয়নো দলৈ সমাজে যি কৈছে আমি সেইধৰণে কৰিছো৷ কামাখ্যাত সাধু-সন্তৰ সংখ্যা প্ৰতিবছৰে বৃদ্ধি পাই আহিছে৷ যিটো ঠাইত দস্তামি আখাৰা আছে, সেই ঠাইটো হ’ল কামাখ্যাৰ পৰিসৰৰ ভিতৰত৷ সেই পৰিসৰৰ ভিতৰত কেতিয়াও শৌচাগাৰ, স্নানাগাৰ আদি বনাবলৈ দিয়া নহয়৷ এয়া ধৰ্মীয় কথা৷ কাৰণ তাত এটা যোনী পীঠ আছে, তাত পানীৰ লিংগ আছে৷ গতিকে তাত থকা সাধু-সন্তসকলে বাহিৰলৈ যাব লাগে৷ তাত সাধু-সন্তৰ সংখ্যা আগতকৈ বহু বাঢ়ি গ’ল৷ আগতে ২০০-৩০০ আছিল, এতিয়া তাত যেতিয়া ৪, ৫ হাজাৰ মানুহ হ’ল, তেওঁলোক বাহিৰলৈ যাবলগীয়া হোৱাত তেওঁলোকে ভাবিবলৈ ল’লে যে তাত কিয় শৌচালয় নাই, এয়া অন্যায় হৈছে৷ এনেকুৱা কিছুমান কথাৰ কাৰণে সমাজলৈ এটা নেতিবাচক বাৰ্তা গৈছে৷ কিন্তু যিয়ে ইয়াৰ ভিতৰৰ কথাবোৰ জানে তেওঁলোকে কেতিয়াও এনেকৈ নাভাবে বুলি মন্ত্ৰীগৰাকীয়ে মন্তব্য কৰে৷ উল্লেখ্য যে, এইবেলি ২২ জুনৰ পৰা ২৬ জুনলৈ অনুষ্ঠিত হৈ যায় ২০২৪ বৰ্ষৰ অম্বুবাচী মেলা৷